AI : Illustrator námskeið
Dagana 3., 4., 10. og 11. febrúar 2009 verð ég með námskeið í Illustrator á vegum Iðunar, fræðsluseturs / prenttæknisviðs.
Þetta er kallað Illustrator II, það er, námskeiðið er ætlað þeim sem hafa undirstöðu í Illustrator en vantar smá frið, tíma og leiðbeinanda til að tileinka sér forritið frekar. Farið verður í gegnum nýja möguleika í Illustrator en aðal áherslan verður lögð á að pína nemendur til að skoða og nýta sér ýmsa eiginleika forritsins sem munu spara þeim tíma og erfiði við vinnu sína strax að námskeiðinu loknu.
Margir sitja fastir í sama farinu ár eftir ár og vinna í Illustrator með þeirri þekkingu sem þeir hafa náð að skrapa saman en gefa sér ekki tíma til að þróa sig áfram. Halda jafnvel að þeir kunni á Illustrator. Illustrator hefur þróast mjög síðustu ár og verður stöðugt betra forrit. Því er það ekki seinna vænna að taka snúning á forritinu og uppfæra sjálfan sig í leiðinni.
Stefnt er að því að á námskeiðinu verði notuð nýjasta útgáfa Illustrator, CS4 en það þarf ekki að hræða fólk frá þótt það sé með eldri CS útgáfur í vinnunni. Vegna þess hve Creative Suite forritin eru farin að vinna vel saman nýtist nánast allt sem farið verður í gegnum mun nýtast beint eða óbeint í öðrum forritum sem notuð eru á auglýsingastofum og prentsmiðjum í dag svo sem InDesign, Photoshop og Flash.
Fólk eins og ég eyðir ómældum tíma í að fylgjast með þróun forrita og verkferla og það væri mikil sóun ef allir færu þannig að. Með því að fara á námskeið er hægt að fleyta rjómann af þessu puði svona fólks á skömmum tíma og fyrir lítið fé.
Þótt ég sé með áróður fyrir mínu námskeiði hérna hvet ég alla til að kynna sér þau námskeið sem í boði eru á vefsíðu Iðunar. Það hefur sjaldan verið boðið upp á eins fjölbreytti úrval námskeiða og á næstu vorönn.
h
Það er uppselt á námskeiðið en ef einhver er sem ekki hefur komist að ætti sá sami að láta setja sig á biðlista. Ég er alveg til í að halda annað námskeið síðar.