Lógósafn.is
Allir sem starfa í auglýsingabransanum á einhvern hátt kannast við þessar endalausu sendingar á lógóum út um víðan völl.
Þetta er auðvitað sjálfsögð þjónusta. Viðskiptavinirnir eru að styrkja eitthvert málefni, prenta boli eða að búa til skyggnur í Powerpoint eða hvað veit maður. Oft er þetta vegna þess að viðskiptavinurinn er að reyna að komast hjá því að láta auglýsingastofuna sína vinna tiltekin verk til að spara pening, láta frænku sína fiffa vefsíðu fyrir sig eða að skiltagerðarmaðurinn ætlar bara að redda hlutunum. Eins getur verið að merkið verði einfaldlega sett inn í umbrot á tímariti sem styrktarlína.
Hvernig sem stendur á lógósendinunni er það alltaf einhver vinna að finna til lógó og senda. Því hafa margar auglýsingastofur sett upp verð fyrir þessa fyrirhöfn við mismiklar vinsældir viðskiptavina.
Það er margt sem gerir þetta ferli flókið. Í fyrsta lagi er á stærri stofunum fyrst haft samband við tengil fyrirtækisins sem svo hefur samband við teiknarann eða jafnvel verkefnastjóra. Teiknarinn afgreiðir svo verkið og sendir. Teiknarinn fær ekki nærri alltaf upplýsingar um í hvað á að nota merkið svo að hann hefur tvo kosti: Senda merkið í fjórlita vector og sem bitmap jpg eða reyna að komast að því í hvað á að nota merkið. Sendi hann bara fjórlita vector er næsta víst að hann fái í hausinn að annað hvort geti kúnninn ekki séð merkið (hann er náttúrulega á pc og bara með Office tól) eða þá að þetta sé ónothæft því merkið eigi að fara í Powerpoint.
Hérna er ég alls ekki að gera stutta sögu langa. Hún gæti vel verið talsvert lengri.
Nokkrar leiðir eru færar til að gera þetta ferli þægilegra og styttra en hvernig sem það yrði gert er alltaf einhver vinna falin sem einhver þarf að borga á endanum.
Viðskiptavinirnir og auglýsingafólk ætti að íhuga alvarlega einn nýjan kost í stöðunni sem á endanum skilar báðum aðilum miklu hagræði fyrir lítið fé.
Hér er ég að tala um logosafn.is Þar er hægt að senda inn lógó fyrirtækjanna í öllum hugsanlegum útgáfum. Ein útgáfa merkis t.d. Illustrator útgáfan, með árs vistun kostar viðskiptavininn 21.800 krónur og svo fer verð fyrir hverja aukaútgáfu stiglækkandi og eins lækkar vistunarárgjaldið hlutfallslega. Í flestum tilfellum ætti að vera nóg að hafa Illustrator vector útgáfu í fjórlit og aðra í RGB og pakkaða sem jpg.
Ég er búinn að skoða þetta aðeins og gera athugasemdir um það sem mér finnst að betur mætti fara og gera má ráð fyrir því að með tíð og tíma þróist verkefnið og verði mun betra. Ef vel tekst til og fyrirtæki hópast inn með merkin sín til að spara fé og fyrirhöfn gæti þetta orðið afar gagnlegt og skemmtilegt.
Möguleikar með svona safn eru ekki bara fólgnir í sparnaði og minni fyrirhöfn. Með því að hafa, segjum öll merki landsins inni opnast möguleiki á að þarna myndist sögusafn líka. Höfundar merkja tilgreindir, ár hönnunar, uppbygging leitarorða svo sem eftir lit og lögun, greinum eða öðru. Bara til að nefna fátt eitt.
Á mínum ferli í þessum bransa man ég eftir tveimur tilraunum til að mynda svona lógósafn. Af hverju það gekk ekki veit ég ekki alveg en mig minnir að hluti af skýringunni hafi verið sá að þar var ætlast til að auglýsingastofurnar borguðu brúsann og eins var verkefnið svo sem ekki sérstaklega vel kynnt. Eins var það og er enn staðreynd að lógómálin eru ekki alltaf í góðu standi hjá stofunum, margar útgáfur í gangi og utanumhald ekki sem skyldi.
Ég vona svo sannarlega að þetta gangi í þetta skiptið enda augljós metnaður í gangi. Tækifærið er frábært í ládeyðunni núna að taka til í þessum málum og koma viðskiptavinunum inn á þetta. Þeir ættu að gleðjast yfir kostnaðarlækkuninni og minnkaðri fyrirhöfn.
