Kort dagsins
Ég er ekki alveg laus við að vera hrifinn af landakortum. Reyndar, þegar ég hugsa út í það, hef ég áhuga á hvers konar upplýsingagrafík. Vel útfærðar skýringamyndir með fréttum og greinum og allt út í snjallar lausnir á gröfum sem útskýra þjóðarhag eða gengi – skýringamyndir sem segja meira en þúsund orð.
Tímarit eins og National Geographic eru í miklu uppáhaldi hvað svona upplýsingagrafík varðar. National Geographic heldur úti veglegri vefsíðu sem gaman er að kíkja á af og til. Kortasíðan er fín og hægt að grúska út í eitt þar. Einn skemmtilegur þáttur Map of the day hóf göngu sína í byrjun árs 2008. Á hverjum virkum degi er varpað fram korti eða upplýsingagrafík úr safni tímaritsins ásamt lesningu sem á við þennan tiltekna dag.
Svo haldið sé lengra: Talsvert er til af efni á netinu um alls kyns upplýsingagrafík annarri. Hægt er að mæla með síðu sem fylgist með nýlegum og athyglisverðum útfærslum, Information Aesthetics.
Einnig langar mig að benda á þessa grafík úr The New York Times, viðtal á Condé Nast Portfolio, við einn af þeim sem gerðu grafið, Lee Byron og nokkur gröf á síðunni hans. Algert brill!
