AA : PDF eyðublöð – jafnvel í Reader
Hið eitursnjalla forrit Adobe Acrobat getur meðal margra annarra hluta búið til eyðublöð (Forms) með reitum til að skrifa í eða haka við.
Hægt er að taka hvaða pdf skrá sem er og bæta ofan á hana reitum fyrir nöfn og heimilisföng og því um líkt, sett inn línur, hnappa til þess að haka í og ýmislegt fleira. Fyrir lengra komna gefst kostur á að setja inn reiti fyrir tölur og samtölur og svo má ekki gleyma að ef menn kunna eitthvað fyrir sér í Java Script opnast heill heimur af möguleikum.
Það væri óðs manns æði að ætla sér að kenna allt þetta hérna. Enda eru til fullt af bókum um þetta ef menn vilja kynna sér og svo auðvitað internetið. Eins er ekki úr vegi að kynna sér hvað forritið býður upp á í Help skránni (slaufa + shift + ?). Það er líklega besti staðurinn til að byrja á.
Í raun er alls ekki flókið að búa til einfalt eyðublað og svo er bara að leita að upplýsingum um það sem á vantar. Uppi í stikunni er líka hnappur til þess að koma manni af stað. Create New Form… leiðir mann af stað fyrstu skrefin.
Sem dæmi um einfalda notkun, þá fær maður einstaka sinnum pdf skrár í tölvupósti sem eru skönnuð eyðublöð sem ætlast er til að maður prenti fyrst út, kroti á með penna og sendi svo með faxtæki til baka. Þá er grá-upplagt að opna skjalið í Acrobat og skutla inn glærum reitum inn á skjalið og fylla svo út. Senda svo skjalið til baka í tölvupósti. Kannski leti, en ég geri þetta iðulega svona.
Undir Tools valblaðinu finnur maður tólin sem hægt er að setja inn og einfaldast að fara neðst á blaðið og láta Acrobat sýna þau á palettu. Hide/Show Forms Toolbar.
Lengst af gátu eingöngu þeir notað svona eyðublöð, fyllt þau út og vistað sem voru með fulla útgáfu af Acrobat. Ekki þeir sem voru með Reader, ókeypis PDF lesarann. Það er líklega ein helsta ástæða þess að þetta er ekki orðið útbreiddara af því að aðeins takmarkaður hópur gat nýtt sér þetta.
Nú hefur þetta breyst með tilkomu Acrobat 8. Sá sem býr til svona eyðublað getur nú virkjað heimild fyrir notendur Reader til þess að fylla út eyðublöðin og vista þau. Gefa þarf heimild á hvert einstakt eyðublað — ekki hægt að hafa forritið forstillt á það.
Aðgerðina framkvæmir maður þegar eyðublaðið er orðið tilbúið. Farið er í valblaðið:
Tools > Typewriter > Enable Typewriter Tool in Acrobat Reader…
Þá er ekkert lengur að vanbúnaði að hefja framleiðsluna.
Þetta er snilld, notaði þetta til að búa til verkseðlaform og auglýsingatemplete. Var búinn að lenda í veseni vegna þess að acrobat reader hjá kúnnanum gat ekki vistað skjölin. Gott að það vandamál er úr sögunni.