AI : Glíman við Overprint úr FreeHand skjölum
Ég var búinn að skrifa dálítið um Overprint áður hérna. Meðal þess sem ég minntist á þar eru þessi vandræði sem fylgja því þegar skjölum úr FreeHand er snúið yfir í Illustrator.
Vandinn er fyrst og fremst fólginn í því að segjum letur sem sem er kannski svart í FreeHand skjalinu kemur yfir í Illustrator og er þá með Overprint á, sem er alveg saklaust. Svo er letrinu breytt í hvítt kannski af því það liggur ofan á mynd, sést á skjánum en prentast ekki út í fínni prenturum. Mjög erfitt að vara sig á þessu.
Margir hafa að undanförnu verið að skipta úr FreeHand yfir í Illustrator eða jafnvel oftar yfir í InDesign. Eiga kannski fullt af eldra FreeHand efni sem þarf að nota áfram og þá er voðinn vís.
Ég var að skoða þetta mál frekar og held að þetta gæti komið að notum:
Í fyrsta lagi er nauðsynlegt að vera alltaf með Overprint Preview á í Illustrator. Í CS3 er hægt að stilla þannig að öll ný skjöl séu með þessari stillingu á. Í eldri útgáfum þarf að setja þetta á í hvert skipti.
Í öðru lagi að hafa Attributes panelinn alltaf tiltækan, en hann sýnir Overprint á Fill og Stroke.
Í þriðja lagi er snjöll skipun í Select > Object > Text Objects. Hún velur aðeins texta, hvort sem hann er á streng eða í textaboxi. Með því að nota þessa leið getur maður valið allan texta eingöngu og tekið Overprint af í einu vetfangi í Attributes panelnum.
Í fjórða lagi er hægt að nálgast á netinu ókeypis viðbót, Plug-in, við Illustrator sem heitir White OP Detector_CS3. Viðbótin finnur allt Overprint sem er í skjali sem er opnað en svo verður maður að hand-breyta sjálfur því sem breyta þarf. Leiðindaspjald birtist sem tilkynnir að allt sé í lagi eða ekki í hvert skipti sem skjal er opnað, en hægt er að losna við það með því að kaupa þessa viðbót fyrir 7 dollara.
Á sömu síðu er hægt að kaupa WhiteOP2KO_CS3 sem gengur lengra, finnur Overprint og tekur það af ef maður óskar þess. Óhætt er að taka undir það með þeim sem bjó þetta til að þessi viðbót borgar sig upp í fyrsta skipti sem hún finnur villu.
Í fimmta lagi er hægt að nota eiginleika í Illustrator sem reyndar er búinn að vera fyrir hendi síðan í útgáfu 10, en það er að nota skriftu, Scripts. Skriftur standa til boða ókeypis víða á netinu. Ég er með eina sérstaklega í huga. Skriftan heitir Overprint_Search.js og er á vefsíðu pictrix.jp. Þessi skrifta finnur og breytir Overprint í skjalinu, býður líka upp á að breyta þótt hlutir séu læstir en gefur einnig möguleika á að skoða bara og breyta engu.
Ekki láta hugfallast af japönskunni sem birtist á síðunni þar sem skriftan er. Halið bara niður þar sem stendur neðst á síðunni OverPrint_Searchzip. Hún er sett í: /Applications/Adobe Illustrator CS3/Presets/Scripts.
Svo er hún keyrð af stað í: File>Scripts > Overprint Search eftir að Illustrator hefur verið endurræstur.
Farið verður nánar í notkun á skriftum í sérstakri grein um skriftur.
