Umslög
Fyrr eða síðar þurfa öll fyrirtæki að láta hanna fyrir sig umslög. Umslög eru afar fjölbreytt flóra, margar mismunandi stærðir og gerðir.
Einfaldast er þegar þarf að hanna umslög í þessum algengu stærðum að fara inn á heimasíður prentsmiðjanna og ná sér í fyrirmynd þar. Ég kíkti á nokkrar heimasíður þeirra og fann í fljótheitum þessar upplýsingar:
Prentsmiðjan Oddi
Oddi er með fína tækniupplýsingasíður og býður upp á niðurhal á stönsum af möppum, cd hulstrum og vectorteikningum af umslögum. Umslögin eru í FreeHand 9 og Illustrator sniði.
Svansprent
Svansprent er með laglega heimasíðu og undir liðnum þjónusta er að finna stansa af möppum og umslögum. Teikningarnar eru í FreeHand 8, sem er ekki alveg í takt við tímann. En það er hægt að pína Illustrator til þess að opna teikningarnar með því að draga skjalið yfir á Illustrator táknmyndina í Dock
Prentmet
Miðað við svona stóra prentsmiðju hefði ég átt von á aðeins meiru. Engir stansar eða umslagateikningar eru sjáanlegar á heimasíðunni en margt annað er gott þó undir Tækniupplýsingar. Það er til dæmis ágætt að vita hversu stór er hægt að prenta hjá þeim.
Gutenberg
Stansa og umslög er hægt að nálgast á heimasíðu þeirra. Þetta eru sömu teikningar og Oddi er með enda í eigu sömu aðila.
Think
Think er með mál á pappír og umslögum en er ekki með teikningar til þess að hala niður. Ég set þá með hér vegna þess að heimasíðan er með gagnlegar upplýsingar meðal annars um pappírsþyngdir sem er einkar athyglisvert.
Umslag
Síðast og ekki síst er að nefna prentsmiðjuna Umslag sem sérhæfir sig í prentun umslaga af öllum stærðum og gerðum og ísetningu efnis í þau. Umslag er með lang bestu upplýsingarnar um umslagaprentun og er það skyldulesning fyrir alla þá sem eru að pæla í að hanna á umslag. Heimasíðan er með teikningar af umslögum í FreeHand 8 og Illustrator 8 sem auðvelt er að krækja í.
