Apple Keynote með OmniOutliner
iWork 08 er nýlega komið út eins og alþjóð veit. Þetta er engin smá uppfærsla frá iWork 06.
Ég er einn af þeim sem hef beðið eftir Numbers í áraraðir, en sterkur orðrómur hefur gengið í mörg ár að Apple ætti til grunn að svona töflureikni einhvers staðar í kistunni. Ég er búinn að yfirfæra nokkur svona skjöl sem ég er alltaf að nota, úr Excel yfir í Numbers og verð að segja að mér finnst breytingin verulega til batnaðar. Mér líður miklu betur í augunum.
Pages hef ég ekki notað af neinu viti, hvorki þessa nýju útgáfu né þá eldri en það fer að líða að því. Viðskiptavinir nota Word og ef maður vill opna skjölin þeirra í Pages og senda þeim Word skjöl sem búin hafa verið til í Pages, verður maður að vinna eftir skotheldu verkferli sem ekki klikkar. Maður einfaldlega nennir ekki að hlusta á væl um ósamhæfni og þess háttar meðan Word á makka vinnur algerlega með pc útgáfunni. Jafnvel þótt ekki sé búið að uppfæra Word upp í Intel útgáfu makka meginn.
Samt sem áður skrifa ég aldrei stakt orð í Word. TextEdit er frábær kostur og ég nota það forrit miklu frekar fyrir texta sem ég þarf að skrifa, ef það er þá ekki tölvupóstur eða blogg.
Keynote er uppáhalds forritið mitt í pakkanum. Ég hef notað Keynote af og til frá því fyrsta útgáfan kom. Reyndar, vegna vinnu, nota ég PowerPoint miklu meira. PowerPoint finnst mér vera nánast óþolandi forrit þótt það þjóni sínum tilgangi. Órökrétt uppröðun á aðgerðum í valseðlum er það sem fer einna mest í taugarnar á mér.
En ég ætlaði nú eiginlega að segja frá lítið þekktri dásemd sem ég nota nánast alfarið þegar ég er að búa til skuggamyndasýningu. Þetta er samspil Keynote og forrits sem heitir OmniOutlinerPro.
OmniOutliner fylgir öllum nýjum mökkum og er í Applications möppunni. Ég nota hins vegar Pro útgáfuna sem býður upp á nokkuð fleiri kosti. Ég hef ekki enn hitt neinn sem hefur gert meira en að opna þetta forrit. Lokað því svo aftur eftir að hafa komist að því það þetta er ekki leikjaforrit.
Forrit sem kölluð eru outliner eru eins konar ritvinnsluforrit sem hægt er að nýta á fjölmarga vegu. Grunnhugtakið er að maður skrifar eina línu eftir aðra — eins konar lista. Með hnappaaðgerð eða músinni getur maður gert undirlínu sem er inndregin og þar undir fleiri línur á því plani. Hver lína, hvort sem hún er aðallína eða undirlína getur haldið áfram að gera undirlínur og þannig myndar svona listi eins konar tré.
Við þetta bætist sá eiginleiki að hægt er að taka í hverja línu og færa hana upp fyrir eða niður; breyta aðallínu í undirlínu og öfugt. Allar undirlínur færast með aðallínu hver sem hún er færð.
Þetta hjómar eflaust alveg óskiljanlega. En málið er hins vegar að þetta er alveg hreint frábært fyrir alla hugmyndavinnu. Hugmynd með undirhugmyndum hanga saman og hægt er að fletta þessum köflum sundur og saman þannig að maður sjái bara aðallínurnar eða allt tréð eins og það leggur sig.
Þegar maður er til dæmis að undirbúa fyrirlestur er ekki óeðlilegt að nota svona outliner. Fyrst lætur maður hugan reika og skrifa niður allt sem manni dettur í hug varðandi hvaða efni þarf að tala um. Í svoleiðis þankaþeytu koma hugmyndirnar ekki alltaf, eða aldrei í nákvæmlega réttri tímaröð, svo það er ágætt að geta umstaflað þeim eins og um hluti væri að ræða. Ekkert kopípeist.
Svo er farið að skoða þessar hugmyndir og raða og þá dúkka upp alls kyns undirhugmyndir og jafnvel undir-undirhugmyndir við hvern lið. Þær eru svo skrifaðar hver undir aðra og hægt að umstafla þeim síðar innbyrðis. Þið verið eiginlega bara að prófa þetta sjálf til þess að sjá hvað ég er að fara. Ekki svo auðvelt að lýsa þessu.
Svona er dæmigert ferli við að búa til skyggnusýningu, slideshow. Aðallínurnar eru titillinn á hverri skyggnu og undirlínurnar eins og textinn á þeim.
Þá kemur snilldin: OmniOutliner býður upp á fjölmarga kosti í Export. Þar á meðal að vista sem Apple Keynote skjöl. Visti maður skjalið þannig er það opnanlegt beint inn í Keynote og aðeins þarf að velja það þema sem maður vill nota og í restina getur maður bætt svo við myndefni ef það á við.
Hérna er lítið dæmi: Fyrri myndin sýnir brot af OmniOutliner skjali sem ég notaði þegar ég var undirbúa fyrirlestur í Listaháskólanum fyrir skemmstu. Eftir að ég var orðinn sáttur með textana fór ég í Export… og vistaði sem Apple Keynote. Opnaði skjalið inn í Keynote og fjórtán skyggunur hoppuðu upp. Valdi síðan allar skyggnurnar og valdi það þema sem ég hafði í huga. Þemað heitir Palo Alto sem ég keypti hjá KeynotePro.com
Kosturinn við að vinna þetta svona er ekki síst sá að maður getur einbeitt sér að innihaldi skyggnanna fyrst á mjög fljótlegan og meðfærilegan hátt áður en maður sleppir sér í útlitsmálin.
