Apple : Á slóðum RSS
Margir eyða óheyrilegum tíma á netinu. Ég er þar líklega engin undantekning en fer þó eftir því hvernig maður skilgreinir óheyrilegt. Aðrir eyða ekki minni tíma í að horfa á sjónvarp og margt af því ekkert sérlega uppbyggjandi. Raunveruleikaþættir eða íþróttir og ýmis konar afþreying. Ég get alveg verið án þess háttar sjónvarpsefnis — það höfðar einfaldlega ekki til mín. Ég hef þess vegna engan sérstakan móral þótt ég noti netið talsvert. Internetið býður reyndar einnig upp á töluvert magn af þvælu. En á sama hátt er netið hafsjór af fróðleik eins og risastór uppflettibók sem gaman og gagnlegt er að guða í.
Smátt og smátt safnast upp hjá manni slóðir á vefi sem maður vill gjarnan fylgjast með reglulega. En það er aldrei svo að hvert einasta innlegg eigi beint erindi til manns heldur er oftast um að ræða að inn komi grein og grein sem maður vill ekki missa af. Einnig er tíðni innleggjanna mishröð og óregluleg þar eð mikill hluti þeirra sem skrifa inn efni eru að gera það á eigin kostnað í frítíma sínum.Það er því mikil tímasóun að vera alltaf að fara inn á hverja einustu síðu sem maður á von á að eitthvað spennandi birtist einhvern tíma. Það verður gjarnan að eins konar áráttuhegðun, ekki ólíkt því sem maður sér hjá sumum þeim sem láta tölvupóstinn sinn koma inn í símann. Eða þá eins og maður sér gjarnan fólk við vinnu stöðugt vera að kíkja af og til allan daginn á mbl.is til þess að gá hvort eitthvað hafi gerst.
Í mínu tilfelli eru sem stendur rúmlega 220 síður um margvísleg efni sem ég vil gjarnan fylgjast með. Margar eru ekkert sérlega spennandi en þó hlýtur að hafa verið einhver ein grein eða málaflokkur á síðunni sem hefur fengið mig til þess að vona að meira komi síðar. Ég gerði ekki mikið annað ef ég færi á allar þessar síður daglega bara til að gá hvort einhver hafi nú skrifað eitthvað nýtt sem gæti höfðað til mín. Svo grisja ég af og til í þessu safni ef síður hætta að viðhalda áhuga mínum á þeim.
Ef maður vill eyða lágmarks tíma í að fylgjast með svona síðum er tilvalið að nýta sér svokallað RRS sem margir bjóða upp á. RRS er brella sem sýnir manni fyrirsagnir greina á vefjum sem maður óskar eftir og í flestum tilfellum nokkrar fyrstu línurnar úr greininni. Ef eitthvað vekur athygli er hægt að smella á fyrirsögnina og greinin hoppar upp í vafranum. Það besta er að maður sér á þessu yfirliti allar greinarnar sem maður ætlar ekki að lesa. Þær eru yfirleitt miklu fleiri en það sem maður vill lesa. Þetta þýðir í raun að maður gerist áskrifandi að efni vefsins.
Nokkuð er mismunandi hvað RSS sýnir manni mikið af greinum. Fyrirsögn greinarinnar er alltaf og svo nokkrar línur oftast. Í einstaka tilfellum er bara sýnd fyrirsögnin eins og til dæmis hjá mbl.is. Mér finnst það frekar pirrandi að geta ekki séð fyrstu línurnar. Það veldur því að ég fer mjög sjaldan inn á þá síðu eftir fréttum. Helst ef einhver starfsfélagi æpir upp yfir sig vegna einhvers sem hann eða hún var að lesa.Síður sem bjóða upp á RSS eru oft merktar þannig að merki er aftast í URL reitnum. Mismunandi merki eru notuð. Safari og Opera eru með blátt RSS merki, Firefox með bylgjur úr standard merkinu.
Sá vafri sem valinn er sem aðalvafri tölvunnar er líka aðal RRS lesari nema maður breyti því. Segjum sem svo að Safari sé aðalvafrinn. Kíkjum aðeins á RSS stillingarnar í honum. Undir Default RSS Reader getur maður valið að aðal RSS lesarinn sé annar vafri eða þá sérhæft forrit fyrir RSS eingöngu eins og sést á myndinni. Einnig er hægt að ákveða hvar haldið er um síðurnar. Forstillt er í Safari að það sé í Bookmarks Bar. Þegar maður setur upp nýja tölvu er hægt að sjá að undir bókamerkinu News er búið að stilla upp svona síðum og sést fjöldi greina sem eru undir hverjum miðli.
Til þess að nýta sér RSS til fullnustu er best að koma sér upp sérhæfðum RSS lesara eða aggregator eins og það er kallað upp á ensku. Eins og sést á myndinni er valið hjá mér að RSS lesarinn sé NewsFire. NewsFire er eitt af þessum sérhæfðu forritum sem lesa RSS tengla. Þegar smellt er á RSS hnapp á vefsíðu eða aftan við URL-ið opnast þetta forrit og býður upp á áskrift að RSS tengingu síðunnar og svo stillir maður til dæmis hve lengi áskrift varir á hverja grein og eins er þægilegt að flokka tenglana niður eftir efni. Mér finnst einn af góðu kostunum sá að ef ég rekst á mjög áhugaverða síðu get ég látið ná í yfirlit yfir greinar allt að sex mánuði aftur í tímann – eða þess vegna alveg frá upphafi.Í fljótu bragði koma upp þrjú RSS forrit í hugann sem ég veit að eru vinsæl. Fleiri má finna á macupdate.com eða versiontracker.com.
NewsFire er nokkuð vinsælt og er forritið sem ég nota sem stendur. Kostar 20 dollara. Sami maður, David Watanabe, gerir þetta forrit og býr til Acquisition og xTorrent sem margir þekkja og hina frábæru Safari viðbót Inquisitor for Safari (sem virkar líka á Safari 3 beta).
NetNewsWire er líka mjög vinsælt og býður upp á fjölmarga möguleika. 30 dollarar. Einnig eru þeir með Lite útgáfu ókeypis.
endo er ekki síður skemmtilegt forrit til þessa brúks og sveigjanleg með afbrigðum. 18 dollarar. Forrit sem ég er að fara að skipta yfir í á næstunni. Ég nota annað forrit frá þessum sama aðila til þess að skrifa þessar greinar, Ecto og líkar vel og einnig er fínn stuðningur við forritin. MacWorld gaf þessu forriti nýlega fjórar og hálfa mús:
„endo 1.0.21 is a good choice for feed addicts with a lot of subscriptions, especially those who are also bloggers or who download lots of media files. I have never used a better RSS news reader.“
Að lokum: Hvað ef maður er alveg ókunnur þessu öllu saman, finnur ekkert nógu áhugavert á netinu og veit yfir höfuð ekkert um hvað þetta snýst allt? Þá væri reynandi að skoða til dæmis þessa síðu og sjá hvort er ekki eitthvað skemmtilegt sem maður vildi kíkja á og jafnvel taka áhættuna á að ánetjast. Það eru til síður um bókstaflega allt. Bútasaumur, tappasöfnun, framleiðni, trúarbrögð, listir og hvað sem er. Það er úr milljónum síðna að velja.… og já, endilega smella á RSS fyrir font.is
