AI : Hvernig á að vista Illustrator eps
Þessi grein fór hér inn fyrir rúmu ári síðan. Ég gerði smávægilegar breytingar á henni og set hana með þeim inn núna.
Sumir ætla að halda áfram að nota FreeHand þar til yfir líkur og gera sig þá væntanlega klára til að halda í gamalt stýrikerfi líka, gamla tölvu og þar fram eftir götunum. Ekkert við þessu að segja og reyndar pínulítið aðdáunarvert. Kannski vaknar FreeHand til lífsins einhvern tíma seinna, kannski, kannski …, en líklega ekki.
Svo eru það hinir sem hafa ákveðið að skipta yfir í hina deildina og fara að nota Illustrator. Ég get alveg skilið að þeir séu dálítið ringlaðir í fyrstu. Á þeim tíma sem engin alvöru uppfærsla hefur komið á FreeHand, eða í rúmlega fimm ár hefur nefnilega ýmislegt breyst í tölvuheiminum og sömuleiðis þær kröfur sem gerðar eru til forrita í okkar grein.
Ég ætla að renna aðeins í gegnum það hvernig er best að vista skjöl út úr Illustrator eins og hann er í dag, CS3 eða Illustrator 13.0.1. Stillingarnar gilda alveg jafnt fyrir eldri útgáfur, CS og CS2. Vonandi verður þetta til þess að létta af fólki áhyggjum þegar það skiptir yfir.
Í FreeHand er eina leiðin til þess að búa til pdf skrá sem skilar íslenskum stöfum að fara í Print og vista þar ps skrá (PostScript) og láta svo Distiller sjá um að búa til pdf skránna. Eps skrá skilar ekki íslenskum stöfum í Freehand. Hægt er að fara framhjá þessu með því að breyta öllu letri í útlínu. Muna þá að geyma skrá sem er með lifandi letri. En sú aðferð er eitthvað svo gærdags. PDF skrár innihalda og skila af sér lifandi letri alveg á leiðarenda ef farið er eftir þessum leiðbeiningum.
Í Illustrator er hægt að fara sömu leið, það er að segja að vista ps skrá og setja hana síðan í Distiller. En miklu einfaldara er hreinlega að vista skjalið sem eps skrá og alls ekki útlína letrið, nema beðið sé sérstaklega um það. Letrið í skjalinu er fellt inn í það eða embeddast eins og það er oftast kallað, inn í skjalið og alla leið inn í pdf skránna sem vanalega er lokatakmarkið.
Ég nota alltaf þá aðferð að vinna í .ai skrá það er Illustrator skrá en ekki í eps. Ég vinn aldrei í eps skrár, hvorki í Illustrator né Photoshop. Þegar ég þarf að vista sem eps nota ég Save a Copy as… Við það vistast eps skráin niður í möppuna sem ég er að vinna í en skiptir ekki út fyrir .ai skránna. Þannig helst .ai skráin alltaf uppi opin og ég fæ aldrei File is busy þegar ég breyti eps skránni í pdf.
Þegar við vistum skjalið sem eps birtist stór platti á skjánum með ýmsum valmöguleikum. EPS Options heitir það. Og nú fer að fara um menn. Skoðum þetta aðeins nánar.
Spjaldinu er skipt upp í reiti og ótal kassar sem merkt er við og aðrir sem ekki er merkt við. Í meginatriðum má segja að ef við værum að vista skjal sem eingöngu væri mynd af rauðum kassa gætum við smellt á OK hnappinn strax. En við erum ekki oft að vinna alveg svo einfalda hluti svo að við gætum þurft að haka við einhverja kassa og breyta smá hér og þar. En þetta er ekki svo hræðilegt.
Preview — forsýn
Hér þurfum við engu að breyta nema við endilega viljum. Þannig er mál með vexti að eiginlega ps sniðið hefur enga forsýn en e-ið í eps þýðir Encapsulated (hylkjað) og EPS þýðir þá PostScript skjal með forsýn, Preview. Forsýnin er til þess að við getum séð hvernig myndin lýtur út þegar við notum hana til dæmis í umbrotsforriti. Macintosh 8-bit er ágætis val sem gefur fína forsýn. Ef Tiff forsýn er valin kviknar jafnframt á hnöppunum Transparent og Opaque. Ef vista á eps skjal fyrir einhver Microsoft Office forrit er nauðsynlegt að velja Opaque.
Transparency — þekja (eigin þýðing — gildir þar til ég heyri eitthvað skárra)
Þessi liður fjallar um yfirprentun og litþekju. Í einföldu skjali myndi vera kveikt á hnappnum Overprint yfirprentun og þær stillingar sem við höfum sett í skjalið varðandi það munu þá haldast og yfirvinna aðrar forstillingar sem kunna að vera í frekari vinnslu á skjalinu. Höldum þessu í Preserve nema annars sé óskað. Svartur í 100% styrkleika er alltaf með overprint í útkeyrslutækjum.
Ef við höfum hins vegar verið að nýta okkur Transparency stillingar til dæmis á litafleti eða notað Drop Shadow og annað í þeim dúr kviknar á Preset hnappnum. Hann er forstilltur á Medium Resolution en ég mæli sterklega með að fært sé í High Resolution fyrir alvöru prentun. Eins og ég myndi svo gjarnan vilja segja oft: Hafðu þetta svona eins og ég segi þar til þú veist betur.
Fonts — letur
Þessi kassi er alltaf forstilltur á Embed Fonts en það er eins og ég nefndi fyrr til þess að lifandi letur fellist inn í skjalið og komi rétt fram í umbrotsskjali eða þá alla leið yfir í Distiller.
Options — aðrar stillingar
Ef mynd er tengd inn í skjalið, ekki felld inn í það kviknar á efsta hnappinum Include Linked Files. Ég hef það fyrir reglu að tengja myndir frekar en að fella þær inn í skjalið og mæli með því af ýmsum ástæðum sem ég fer í seinna.
Næstu tvær stillingar eru forstilltar og ekki ástæða til að hrófla við þeim.
Næsta þar á eftir, Compatible Gradient and Gradient Mesh Printing er stilling sem best er að sleppa, því hún getur hægt á prentun. Þessi skipun er fyrst og fremst til þess að auka prentmöguleika á eldri tæki sem ekki styðja nútíma tóneringu.
Forstillt er á LanguageLevel 2 á hnappnum Adobe PostScript. Það dugir fyrir skjöl af einfaldara taginu en öruggara að setja það á LanguageLevel 3 ef skjalið er flókið. Algert skilyrði fyrir skjöl með Transparency. Ég set þetta alltaf á sama hvernig skjalið er svo ég gleymi því örugglega ekki þegar mikið liggur við.
Warnings — aðvaranir
Það sem stendur í þessum glugga vísar í flestum tilfellum til nokkuð sérhæfðra hluta og hræðir hvern mann upp úr skónum að lesa þetta. Ekki guða of mikið í þetta því þessar stillingar sem ég mæli með hér að ofan eiga að vera skotheldar. Þó er aldrei of varlega farið og ýmsu hægt að klúðra áður en komið er að því að vista skjalið.
