MacWorldExpo 2007
Það fór sem mig grunaði að enginn tími var til þess að skrifa pistla. Ég kom heim á mánudaginn var, 15. janúar og hef aldrei áður verið haldinn eins mikilli þotuþreytu.
Í stuttu máli var þessi ferð aðeins meira en að fara á MacWorld sýninguna í San Francisco sem haldin var 7.-12. janúar. Ég hafði samþykkt að taka þátt í ferðalagi nokkurra félaga sem ég hef þekkt í gegnum netið, suma í allt að tíu ár. Sumum kann að finnast þetta undarlegt að fara að hitta svona bláókunnuga menn. Það skondna er að ef manni hefur líkað fólk á netinu, kann maður líka við það þegar maður hittir það „life“. Þetta hef ég marg reynt.
Ég flaug til Portland í Oregon 2. janúar. Eftir 24 stunda ferðalag komst ég inn á hótel á flugvellinum í Portland. Þá var klukkan næstum þrjú að nóttu þar. Um níuleytið morguninn eftir var ég sóttur á hótelið af Michael Lynch, sem ég hef þekkt í næstum tíu ár í leturáhugamannakreðs á netinu. Hann skipulagði þetta ferðalag okkar og sá um að panta alla gistingu og veitingastaði, ásamt því að leggja til stóran bíl til fararinnar. Við fórum aftur upp á flugvöll og sóttum þrjá aðra félaga okkar. Þetta eru allt saman miklir áhugamenn um leturmál af öllu tagi. Eiginlega meira en það – sumir eru leturhönnuðir að atvinnu.
Við vorum í góðu yfirlæti í heimabæ Michael, Newport (þar sem Keikó heitinn átti heima) 3. og 4. janúar. Eins og gefur að skilja var kátt á hjalla og mikið skrafað um áhugamálið og reyndar var margt annað sem bar á góma. Þrír af okkur ferðalöngunum, ég, Alejandro Paul frá Argentínu og Patrick Griffin frá Kanada, héldum svo fyrirlestra í MUGPort um ýmsa anga leturmála. Ég hef minnst á Alejandro áður hér en segi aðeins meira af Patrick síðar. Auk þessara var með okkur Breti sem býr í Los Angeles, Guy Oldham. Frábær náungi. MUGPort er Mac User Group þeirra í Newport. Michael er formaður félagsins og við vorum að gera honum smá greiða upp í allan undirbúninginn sem hann sá um fyrir okkur. Hægt er að kíkja á myndir frá fyrirlestrinum á síðu MUGPort.
Við gistum á hótelinu Elisabeth Inn þarna í bænum en heimsóttum Michael og fjölskyldu hans og borðuðum með þeim kvöldmat á veitingastaðnum Local Ocean sem stendur við höfnina. Fyrir fyrirlesturinn borðuðum við öll aftur á Saffron Salmon sem einnig er við höfnina.
5. janúar lögðum við eldsnemma af stað í áttina að SF en sú leið er um 800 km. Keyrðum meðfram ströndinni sem er ákaflega falleg leið. Póstkortasýn alla leið. Gistum eina nótt á mjög sérstöku hóteli, The Benbow Inn sem líktist helst sögusviði úr Agötu Christie bók. Frábær veitingastaður og vín þar ekki af verri endanum.
Daginn eftir þann 6., héldum við svo áfram ferðinni í gegnum rauðviðarskógana og gerðum svo stuttan stans í SF til þess að taka upp einn ferðafélaga í viðbót.
Þá var haldið enn lengra suður á bóginn til Carmel. Þar var Clint Eastwood borgarstjóri í nokkur ár eins og kunnugt er. Við gistum í tvær nætur á búgarði sem hann á Mission Ranch. Mjög skemmtileg aðstaða og ágætis veitingastaður og bar þarna á staðnum. Þaðan gerðum við svo út til þess að skoða meira af því sem Bandaríkjamönnum með sína stuttu sögu finnst mikið til koma í sínu heimalandi. Toppurinn af því var heimsókn í Hearst Castle, fyrrum bústaðar Hearst blaðakóngs (Citizen Kane). Undarlegasta fyrirbæri það, samsetningur af stílum og stefnum í langri sögu Evrópu en fróðlegt og tilkomumikið að sjá.
Inn í San Franciscoborg renndum við um hádegisbilið þann 7. Eftir að hafa skoðað nokkra skemmtilega staði svo sem Golden Gate brúnna, sem ég var í raun að sjá í fyrsta skipti núna og Castro Street sem Dóri minnist á fórum við og gengum frá skráningu á MacWorld sýninguna. Nokkrir af þeim sem voru með í hópnum vildu ólmir komast á Keynote og keyptu dýra passa til þess að fá rétt til þess. Ég ákvað að breyta ekki af venju minni og sleppti Keynote eins og vanalega.
Við melduðum okkur svo allir á sama hótelið og þar bættist Hollendingur í hópinn, félagi okkar af netinu sem ekki hafði samt haft tök á því að fara í langferðina miklu.
MacWorld Expo var haldin frá 7.-12. janúar eins og áður sagði. Sýningin sjálf hófst þann áttunda að lokinni framsögu Steve Jobs um iPhone og Apple TV og fleira. Mér finnst alltaf jafn fróðlegt að sjá sýninguna og geta hitt fulltrúa framleiðenda og spurt spjörunum úr á staðnum. Oftast kemur eitthvað fram sem ekki næst með því að lesa eingöngu vefsíður fyrirtækjanna.
Næstu þrjá daga sat ég svo meira og minna fyrirlestra sem boðið er upp á enda var það megintilgangurinn með minni ferð á sýninguna. Þarna fæst í hnotskurn mikið magn af upplýsingum um ýmis makkamál og fyrir mér er þetta ótrúlega skemmtilegt og fróðlegt. Nesti til margra mánaða. Ég ætla ekki að bæta neinu við lýsingu á sýningunni sjálfri eða dótinu sem var þar kynnt. Af nógu er að taka annars staðar um það. En síminn var samt rosalega flottur.
