Og táknið – Ampersand
& táknið, stendur fyrir orðið „og“ en er stytting á latneska orðinu „et“ sem þýðir það sama – og.
Táknið á sér ýmsar fjölbreytilegar myndir í letri. Elstu heimildir um notkun á tákninu er að finna í rómversku handriti frá því um 75 eftir Krist. Langþekktastar eru & myndir af því, en nokkrar aðrar grunnútgáfur eru til. Líkjast sumar oft öfugum þremur eða öllu heldur E og oft má sjá móta fyrir bæði e og t í þessum táknum.
Táknið heitir líka Ampersand, leitt af „and per se and“ sem ég treysti mér varla til að þýða.
Þetta og-tákn er lítið notað hér á landi og önnur afbrigði en þetta & eiga frekar erfitt uppdráttar af því þau virka full framandi á marga. Nokkur synd, því skemmtilegra væri að hafa meiri fjölbreytni í þessu sem öðru. Einnig eru þessi tákn með þeim fallegri í letrum. Vert er að skoða hve oft er mikill munur á &-tákninu milli Regular og Italic gerða letursins. Dæmi: Hoefler Text Regular & Italic; Fago Regular & Italic.
