ID : Flýtiskipanir fyrir stílsnið
Margir sem hafa mikla reynslu af umbroti í Quark en vinna núna meira eða eingöngu á InDesign sakna þess að hafa ekki aðgang að f-hnöppunum til þess að hengja stílsniðin (Paragraph Styles) á. Það er ekki alveg klárt afhverju Adobe leyfir ekki að þessir hnappar séu notaðir í InDesign nema með öðrum aukahnöppum.
Kosturinn við að hengja stílsniðin við f-hnappana er augljós: Aðeins eitt handtak með vinstri hendinni. Flestir aðrir valkostir virðast í samanburði vera fjallabaksleið.
En hverjir aðrir kostir eru í stöðunni? InDesign býður upp á þann möguleika að hengja næstum hvaða aðrar skipanir á stílsniðin svo sem að nota talnaborðið með einhverjum breytihnappi, til dæmis Slaufa + Option + 1 fyrir fyrirsögn og svo framvegis. Margir nota þetta og hafa jafnvel notað allar götur síðan í Quark.
Ég notaði á árum áður QuicKeys mikið til þess að bæta upp skort á hnappaskipunum. Reynar er ég farinn að nota QuicKeys aftur fyrir annað en í dag þegar Adobe forritin sjálf bjóða upp á að búa til skipanir er það líklega full langt gengið að bæta við QK eða sambærilegum forritum ofan á það allt saman.
Hins vegar er ein leið sem menn ættu að skoða vandlega. Ein leið og smá pæling um verklag. Segjum sem svo að við byrjum á að búa til nokkur algeng stílsnið, fyrirsögn, millifyrirsögn, meginmál, meginmál með inndrætti sem dæmi. Skírum sniðin svona:
- fs fyrirsögn
- mf millifyrirsögn
- mm meginmál
- mi meginmál m inndr (byggjum þessa auðvitað á mm)
Nú setjum við textabendilinn inn efst í textann og notum efirleiðis aðeins píluhnappana til þess að færa okkur milli málsgreinanna. Tilvalið er í framhaldinu eftir lestur þessarar greinar að tileinka sér skipanir við að færa píluna um textann eins og lýst er í annarri grein hérna á setrinu.
Þegar bendillinn er kominn á sinn stað sláum við inn: Slaufa + Return. Við þetta opnast paletta uppi til hægri með lista yfir öll stílsniðin sem við erum búin að búa til. Eins og sést er lítill innsetningargluggi á þessari palettu. Þetta er sía á stílsniðin og nóg að slá á hnappaborðið til þess að einangra stílsniðin þar til það eitt er eftir sem við ætlum að nota. Ef maður slær til dæmis inn m verða eftir þrjú snið en um leið og næsti stafur er sleginn inn f, m eða i, þrengist valið þar til eitt er eftir.
Á hnappaborðið sláum við inn: fs og svo Return á eftir. Við þetta fer öll málsgreinin í fyrirsagnastílsniðið. Færum okkur með pílunni yfir í næstu málsgrein, slaufa + Return, sláum inn mf og sú málsgrein er komin í millifyrirsagnarstílsniðið.
Megin kosturinn við þessa leið er sá að maður getur haldið höndunum á hnappaborðinu og getur sleppt því að teygja sig yfir í músina til þess að velja stílsniðin af Paragraph Styles palettunni. Næstum því eins gott og f-hnappaleiðin.
Það er svo undir hverjum og einum komið með útfærslur á þessu og betrumbætur. Kæmi til greina í einhverjum tilfellum að setja allan textann í meginmálssnið fyrst og renna svo bara yfir textann aftur til þess að breyta yfir í fyrirsagnir og millifyrirsagnir? Það væri gaman að heyra hvort einhverjir hafa einhverjar snjallar viðbætur við þetta.
