AI : ID : Textabox
Ég ætla nú bara að fjalla lítillega um einn þátt textakassa í Illustrator – og aðeins í InDesign sem ég hef heyrt fólk vera að pirra sig svolítið á.
Þannig er mál með vexti að þegar hafa verið settar málsgreinastillingar í InDesign og Illustrator á textakassa, svo sem inndráttur og tab dálkastillingar, haldast þær þótt boxið sé minnkað. Sem þær eiga auðvitað að gera ef maður er einfaldlega að breyta lögun kassans.
En málið verður aðeins flóknara ef minnka á kassana hlutfallslega. Þá er ekki eins skemmtilegt að dálkastillingarnar haldist óbreyttar. Þessi staða kemur upp þegar er verið að minnka auglýsingu úr heilsíðu í fjögurra dálka svo eitthvert klassískt dæmi sé tekið. Eða að skyndilega hefur verið breytt um pappírsstærð í ársskýrslu og þarf að minnka allt um hálfan punkt.
Í InDesign er gert ráð fyrir þessu og svarið er að í stað þess að halda eingöngu í Shift hnappinn þegar boxið er minnkað er bætt við Slaufu hnappnum svo allt minnki í réttu hlutfalli. Málið leyst.
Ég vona bara að menn geri flóknar ársskýrslur og þess háttar í InDesign og haldi sig við einfaldari hluti í Illustrator því þetta er ekki svona einfalt þar. Þó má alltaf gera ráð fyrir að einhver leiki sér með málsgreinastillingar í auglýsingum. Ég geri það í það minnsta og hef skrifað um það hér.
Flestir minnka eflaust bara textaboxið í Illustrator, velja textann og skjaka svo við dálkastilingunum þar til þetta lítur svona nokkurn veginn eins og það gerði áður. En fyrir þá sem vilja vera aðeins nákvæmari er hérna sú eina leið sem ég hef fundið til þess að gera þetta:
- Í stað þess að minnka eða stækka textaboxið með því að færa hann sundur og saman með aðstoð hornkassanna, er Scale tólið notað. Þetta er til þess að maður geti fengið stærðarbreytinguna í nákvæmri prósentu. Hana má sjá í Info palettunni. Window > Info (F8). Gefum okkur að við höfum minnkað textaboxið um 72%.
- Næst er farið í Tabs stikuna Shift + Slaufa + T. Veljum dálkahakið og tala kviknar í reit í stikunni. Segjum að það sé núna 10 mm.
- Nú skrifum við fyrir aftan 10 mm, annað hvort: *.72 eða *72%. Þetta lítur þá svona út: 10 mm*72%.
- Return eða Enter.
Í Paragraph palettunni (Shift + Val + T) er kannski inndráttur stilltur á 28,35 pt, sem er sama og 10 mm. Þar getum við farið inn líka og gert nákvæmlega það sama: 28,35 pt*72%. Sláum svo á Enter og inndrátturinn breytist í sama hlutfalli og minnkunin á textaboxinu.
Þessi eiginleiki í forritum finnst víða, ekki bara í Adobe CS pakkanum og er upplagt að notfæra sér þetta við fleiri tækifæri. Sem dæmi, eins og sést í Paragraph palettunni er hún hjá flestum í punktum. Með því að velja stillireitinn og skrifa 10 mm fáum við 10 mm inndrátt en talan breytist samstundis í 28,35 pt. Þessir reitir taka meðal annars margföldun eins og hér er sýnt að undan, en einnig deilingu, blöndun á mælieiningum og ýmislegt annað.
