Argentína 2006 : Fleyting milli landa
Sunnudagar í borgum eru oft svolítið vandræðalegir. Best að nota þá til þess að skoða söfn eða gera sér ferð á einhvern stað. Við notuðum daginn þannig og skelltum okkur yfir til Uruguay í dag.
Siglt er frá höfninni í Buenos Aires og tekur það um einn tíma. Við vorum svo heppin að Uruguaybúi nokkur gaf sig á tal við okkur þegar hann heyrði okkar framandi mál. Hann fræddi okkur um sögu lands og þjóðar og benti okkur á margt sem vert væri að hafa í huga og drekka í bænum sem við vorum að fara til, Colonia.
Þessi bær er lágreistur og var byggður upphaflega af Portúgölum. Sjá má leifar af því tímabili í steinhlöðnum húsum. Þá komu Spánverjar og byggðu sín hús múrhúðuð, stundum ofan á þau portúgölsku. Eftir koma svo ýmis stílbrigði eftir því hvers lenskir innflytjendur voru. Þessi fjölbreytileiki er einnig mjög sýnilegur í ýmsum hverfum í Buenos Aires og gaman að virða þetta fyrir sér.
Úrúvæjar gera vín sín gjarnan úr þrúgu sem heitir Tannat, mjög tannínrík vín og við lágum ekki á liði okkar að prófa þessi nánast svörtu vín. Annað sem þeir drekka af miklum móð ásamt Argentínumönnum, Paragvæjum og öðrum nágrönnum er Yerba Mate. Þetta er jurtate sem drukkið er ýmist úr stórum holuðum fræjum, trébollum eða þá úr leðurbollum sem kallaðir eru Mate. Drykkurinn er sogaður upp með pípu sem er með sigti að neðan. Í Colonia ganga menn með bollann hvert sem þeir fara og unglingar jafnt sem fullorðnir rogast að auki með hitabrúsa undir hendinni.
Við borðuðum á tveimur veitingahúsum í bænum milli þess sem við skoðuðum svæðið og mannlífið í glampandi sól og tannatvínin prófuð. Við sigldum svo til baka um áttaleytið og komum útkeyrð á hótelið.
