Argentína 2006 : Club Tapiz
Rétt fyrir hádegi skráðum við okkur út af Park Hyatt og tókum leigubíl upp í sveit með það fyrir augum að gista eina nótt á vínbúgarði. Við höfðum valið okkur Club Tapiz sem er gististaður með sjö herbergjum í aflagðri vínfabrikku svona þrjátíu mínútna leigubílaakstur frá miðborg Mendoza.
Við höfðum séð myndirnar á netinu en þetta var framar öllum væntingum. Herbergin eru þokkalega stór og sérlega hlýleg og allur aðbúnaður annar eins og á besta hóteli. Sundlaug í garðinum og gufubað og slökunaraðstaða og einnig hægt að panta sér nudd fyrir lítið fé. Hægt er að ramba um allan staðinn og virða fyrir sér risa vínámur sem lagðar hafa verið af.
Tapiz er stór vínframleiðandi en framleiðslan hefur verið flutt í nútímalegra húsnæði. Upplagt var því að breyta gömlu verksmiðjunni í gististtað. Minnir þetta dálítið á svokallaðan agriturismo sem mikill uppgangur hefur verið í á Ítalíu þar sem bændabýlum og óðalssetrum er breytt í gistisaðstöðu.
Klukkan átta um kvöldið var svo boðið upp á vín í sameiginlegri stofu áður en gestir héldu annað í leit að kvöldmat eða borðuðu á veitingahúsi staðarins sem ekki er af verri endanum. Á einni vefsíðu er þetta veitingahús flokkað með þeim bestu á Mendoza svæðinu.
Því miður leyfði tíminn ekki að við dveldum lengur en einn sólarhring þarna – þrír dagar hefði verið betra. Staðurinn væri kjörinn sem miðpunktur ferðalaga í allar áttir um svæðið.
