Argentína 2006 : Aftur til Buenos Aires
Um miðjan dag héldum við út á flugvöllinn í Mendoza og flugum til Buenos Aires. Hótelið sem við verðum á núna heitir Five. Þetta er virkilega skemmtilegt og nýlegt hótel en það mætti samt alveg mála veggi og skrúbba flísafúgur. Herbergin aðeins minni en við vöndumst á fyrri hótelunum. En þetta er um það bil það eina sem ég gæti fundið að.
Á móti kemur að hótelið er í einum skemmtilegasta hluta Buenos Aires, Palermo. Palermo er lágreist hverfi og minnir pínulítið á Greenwich Village í New York. Í Palermo hafa hönnuðir af öllum gerðum komið sér fyrir og opnað verkstæði og búðir í löngum bunum. Kaffihús og veitingastaðir elta svo mannlífið og úr verður skemmtileg blanda. Margir af bestu veitingastöðunum eru þarna og ætlunin er að kíkja á nokkra þeirra.
Um kvöldið fórum við á víetnamskan stað í hverfinu sem heitir Green Bambo. Gæddum okkur á spare-ribs, öndum og fleiru. Stórkostlegur matur.
