AI : Save a Copy… fingraleikfimi
Hér er smá viðbót við pistilinn um Save a Copy… sem flýtir ennþá meira fyrir manni.
Málið er að við nafn skjalsins bætist við orðið copy sem mér er afar illa við. Mér finnst þetta alger óþarfi þar sem þessi vinnsluaðferð sem ég lýsti þýðir að .eps skjalið er alltaf afrit. Það kostar alltaf einhverjar sekúndur að losa sig við þetta orð. Sekúndurnar safnast upp og best að hafa þær sem fæstar.
Þess vegna er ágætt að bæta við þessu smá ferli sem lágmarkar tímann sem fer í þetta:
Þegar ég er búinn að vinna í Illustrator skjalinu, (.ai) og komið er að því að ég þarf að fara að senda frá mér pdf skjal byrja ég á því að búa til .eps skrá eins og lýst er í greininni.
Það sem flýtir fyrir heil ósköp er þetta ferli:
- Save a Copy… Held niðri option (Alt) + slaufu + s. Þá kemur upp gluggi með nafni skjalsins valið. .ai er fyrir aftan – ekki valið.
- Smelli á hægri píluhnappinn á hnappaborðinu einu sinni. Við þetta hrekkur textabendillinn aftast í valda orðinu, nafni skjalsins á eftir copy og undan .ai.
- Slæ á bakkhnappinn (Backspace) fimm sinnum (ég drippla reyndar vísifingri og löngutöng upp og niður við þetta og tel í huganum upp að fimm
). Þurrka þannig út orðið copy og bilið á undan því.
Nú get ég farið á Format: hnappinn neðst og skipt úr Adobe Illustrator Document yfir í Illustrator EPS. Og að lokum er smellt á OK.
Ef ég slysast til þess að afvelja nafn skjalsins t.d. með því að smella á einhverja möppu sem ég ætla að láta það í get ég svert nafnið aftur með því að smella sex sinnum á tab hnappinn.
Þetta er líklega með því kúnstugra sem ég hef nefnt hérna. En það er einfaldlega þannig að ég hef mikinn áhuga á öllu sem getur bætt verkferla og flýtt fyrir manni. Þetta er aðeins eitt af mörgu sem hægt er að tína til. Ég geri ráð fyrir því að þeir sem koma hér við reglulega hafi að minnsta kosti smá snefil af þessum sama áhuga og þess vegna má búast við að ég skrifi af og til um þessi og skyld mál.
