PS : Sjálfvalið lag, Auto Select Layer
Þegar maður vinnur með mörg lög í Photoshop getur verið mjög þægilegt að hafa stillinguna Auto Select Layer á. Þetta er sett á þarna uppi vinstra megin í stjórnræmunni. 
Þegar er hakað í kassann þarna velst eftir það sjálfkrafa það lag sem maður smellir á í hvert skipti í stað þess að þurfa alltaf að fara í Layers pallettuna og velja það lag sem á að fara að vinna í næst eða færa til.
En svo er það oft, ekki alveg eins oft þó, sem þetta er hreinlega fyrir manni og hentugra að afhaka og handvelja í Layer pallettunni. Allt eftir því hvað maður er að gera. Þetta er svona æ!, ó! stemmning; ætlaði ekki að velja þetta!, eða að maður gleymdi að færa sig á milli laga. Það getur nefnilega verið ansi þreytandi að vera sífellt að skruna upp og niður í Layer pallettunni.
En hvernig væri þá að nota þessa aðferð:
Taktu hakið af Auto Select Layer. Þegar þú ætlar að fara að vinna í einhverjum hluta myndarinnar, heldur þú niðri slaufunni, stjórnhnappnum Command og smellir á það sem þú vilt vinna í. Þetta virkar þá alveg eins og tímabundið Auto Select Layer og eins og þú sérð í Layers pallettunni er rétta lagið valið.
Ein önnur leið er að halda niðri Control og styðja með pílunni. Þá kemur upp listi yfir þau lög sem eru þar undir.
Ekki segja mér að ég sé sá síðasti í heiminum til þess að uppgötva þetta!
