Íslenska í Firefox
Hvað ætli sé búið að fjalla oft um það á apple.is hvort íslenska eða enska eigi að vera ofar í System Preferences — International — Languages? Umræðan mun eflaust halda áfram eitthvað um sinn. Í það minnsta þar til alfarið verður hægt að hafa íslenskuna efst — eins og hún ætti að vera.
Málið er hins vegar að það eru ótal forrit sem virka ekki rétt nema að enskan sé ofar. Sem dæmi má nefna Software Update, en einmitt það forrit varð til þess að ég set enskuna alltaf ofar í öllum tölvum sem ég set upp. Mér hefur sýnst að forrit krassi mun síður ef enskan er ofar og almennt hreinlega heilsast tölvunum betur.
Annað forrit sem vert er að nefna er Firefox því svo margir spyrja um það. Hann sýnir ekki íslenska stafi nema enskan sé ofar, eins skondið og það nú kann að hljóma.
Það er þess virði að athuga hvort málið sé að hafa enskuna ofar ef maður verður var við dularfulla hegðun í tölvunni.
