Mail : Færri kíló
Setjum sem svo að við séum með nokkuð stóra mynd í jpg sniði, kannski svona 10 mb, sem við erum búin að velja fyrir viðskiptavin. Eða jafnvel álíka stóra fjölskyldumynd sem við ætlum að senda kunningjum. Einfaldasta mál í heimi er að draga myndina inn í textaflötinn í Mail og ýta svo á Send hnappinn.
Við vitum að fyrir marga er alger plága að fá svona stóran póst ef aðeins á að skoða myndina. Þá er vanalega leiðin að opna myndina inn í Photoshop eða svipað forrit, minnka myndina, vista og senda.
Mail getur hins vegar tekið þessa fyrirhöfn af manni. Þegar myndin þunga hefur verið dregin inn í póstinn birtist neðst á glugga póstsins hve stór myndin er sem á að senda.
Til hægri er svo spretthnappur sem á stendur Actual Size.
Þegar stutt er á hnappinn eru gefnir upp þrír valmöguleikar ef myndin er stór en færri ef Mail telur ekki þörf á að minnka myndina.
Í þessu dæmi valdi ég Small og myndin fer úr 7,8 mb í 142 k!
Þokkalega góður megrunarkúr.
