Suitcase Fusion
Í síðasta mánuði kom út ný og endurbætt útgáfa af hinu vinsæla leturstjórnunarforriti Suitcase frá Extensis. Nafninu hefur verið breytt í Suitcase Fusion. Fusion nafnið helgast af því að steypt hefur verið saman forritunum Suitcase og Font Reserve sem Extensis keypti á síðasta ári. Með þessari nýju útgáfu er loksins út sögunni að virkja sé hægt letur þar sem það er statt í tölvunni. Öll helstu leturstýriforritin hafa farið þessa leið, nema Adobe Type Manager (ATM) og Suitcase.
Ég hef alltaf verið fylgjandi þeirri leið sem ATM notaði en verð að játa að það eru ótvíræðir kostir að hafa leturbankann sem er notaður allan á sama stað. En ekki má samt misskilja; letrin sem maður á geta verið hvar sem er og maður raðað þeim eins og maður vill sjálfur áfram. Forritin færa letrið, eða afrita sem virkjað er á einn stað og raða þeim þar í stafrófsröð fyrir sig. Við þurfum eftir það ekkert að hugsa um leturbankann sem forritin byggja á. Við getum gert þau óvirk eða fjarlægt alveg innan úr forritinu. Eina sem þarf að hugsa um er að það sé nóg pláss á disknum sem hýsir letrið.
Leturbankinn nýtist leturstýriforritunum einnig við að stjórna því að maður opni ekki fleiri en eitt eintak af sama letri, en tvö virk eintök af sama letri geta skapað heilmikil vandræði.
Þetta hefur þann kost að forritið þarf ekki að halda utan um marga staði sem letrið er geymt á og litlar líkur til þess að letur verði óvirkt af því það hafi verið hreyft úr stað eða því um líkt. Ég hvet alla til þess að láta forritin afrita yfir í leturbankann frekar en að færa því hætt er við að maður glati letri alveg af tölvunni ef eina eintakið af letrinu hefur verið fært þangað en síðan eytt innan í forritinu.
Suitcase Fusion er afar líkt gamla góða Suitcase og fátt sem kemur á óvart í forritinu við fyrstu sýn. Þó eru nokkur mikilvæg atriði sem hafa bæst við og vert er að hyggja að.
- Miklu meiri og betri upplýsingar eru um hvert letur, hver framleiðir, flokkun leturs og hvar á tölvunni upprunaletrið er.
- Hægt er nú að kveikja á einni stungu af leturfjölskyldu í stað þess að vera bundinn við að virkja allaf alla fjölskylduna.
- Flokkun leturs er innbyggð ef letrið inniheldur þær upplýsingar en einnig er hægt að bæta við eigin flokkum, svo sem hinum vinsæla Skriftarfontar.
- Sjálfvirk kveiking á letri er orðin fullkomnari en áður var og uppfærð að nýjustu útgáfum Adobe og Quark umbrots– og teikniforritum (Quark 7 verður svo bætt við um leið og sú útgáfa kemur út)
- Tímabundin virkjun á letri er komin í nýjar hæðir og getur nú miðast við að letrið verði óvirkt þegar slökkt er á tilteknu forriti eða tilteknu skjali lokað.
Þetta er það helsta og er þó ekki allt upp talið.
Suitcase Fusion fæst á uppfærsluverði ef maður á gamla Suitcase eða ef svo ólíklega vill til að maður eigi Font Reserve. Kaupauki, og enginn smá, er svo Font Doctor sem er ómissandi tól fyrir þá sem vilja vera með letrið í lagi. Ég mæli með Font Doctor, sama hvort menn nota Suitcase Fusion eða annað forrit. Linotype FontExplorerX, sem er ókeypis býður ekki upp á viðgerð á letri og því gott að vita af þessu verkfæri.
