Álitsgjöf opin frá 10.30 til hálf ellefu
Nú er ég búinn að hafa font.is með þessu formi í einn og hálfan mánuð eða svo, þótt font.is hafi verið til í tvö ár… kannski þrjú.
Samkvæmt upplýsingum um vefinn frá 1. til og með 6. júlí hafa 40 stakir aðilar heimsótt síðuna það sem af er júlí og meðaltal heimsókna 17 á dag. Þetta er stöðugt að aukast og mér finnst það þokkalegt miðað við að efnið er enn sem komið eingöngu á íslensku og því verulega lítill hluti heimsins sem getur lesið þetta og svo er efnið líka nokkuð sérhæft.
Það er í sjálfu sér ekkert keppnismál fyrir mig að fá margar heimsóknir. Frekar að þeir sem koma og lesa hafi gagn og kannski gaman af því að lesa þetta. Það er stefnan að þýða að minnsta kosti hluta greinanna yfir á ensku. Meðal annars er það vegna þess að mikil eftirspurn er eftir efni eins og þessu sem hér er boðið upp á og margir að leita eftir hjálp og upplýsingum. Ég býst við að það verði með þeim hætti að ég noti sömu dagssetningu á þýðingarnar og íslenska útgáfan er svo enska efnið fari allt í archive en poppi ekki upp á aðalsíðu.
Í upphafi ákvað ég að hafa ekki opið comment hér til þess að byrja með. Aðallega af því að ég hef svo mikið að gera alltaf og óttast að þurfa að bæta á mig vinnu við að svara eða útskýra frekar það sem ég hef skrifað. Það þýðir hins vegar það að ég hef ekki hugmynd um hvernig fólki líkar. Ég myndi þiggja að fólk sendi mér línu í tölvupósti og segði mér sína skoðun og eins ef einhverjar óskir eru um einhver skrif eða þess háttar.
Skrifið á sigurarm[at]islenska.is
Sumarleyfið mitt er alveg að skella á en ég skrifa þó eitthvað í því. Af nógu er að taka.
Takk fyrir heimsóknirnar.
