AI : Lyklaborðsskipanir í ólagi
Eitt af því sem gerist við uppfærslu upp í Tiger er að lyklaborðsskipanir virka ekki í Illustrator. Þetta gerist í hvert skipti sem Illustrator er ræstur, hvort sem um er að ræða Illustrator 11 eða 12, CS eða CS2. Við hér á Íslandi erum ekki ein um að eiga við þennan vanda.
Þótt þreytandi sé, er mjög einfalt að leysa þetta en lausnina þarf að endurtaka í hvert skipti sem Illustrator er ræstur. Sem sagt, best að vera ekkert að slökkva á honum.
Það sem maður gerir er:
A. Skiptu yfir í US fánann í valröndinni (menu). Ekki skipta í US Extended, bara þennan venjulega.
B. Veldu einhvern hlut í verkinu sem þú ert að vinna í. Gerðu einhverja flýtiskipun, t.d. Slaufa — C.
C. Skiptu nú yfir í íslenska fánann aftur og allt er komið í lag.
Málið snýst um að Illustrator er eitthvað pirraður í fyrstu yfir Unicode lyklaborðum. Adobe hefur sent út leiðbeiningar um þetta, en þeim láist að nefna að það er ekkert mál að skipta svo yfir í Unicode lyklaborð, eins og til dæmis það íslenska.
Viðbót 15.05.2007: Þetta var lagfært í seinni uppfærslu á stýrikerfinu.
