FontAgentPro
FontAgentPro og FontAgent eru tvö náskyld leturstýriforrit. FontAgent fyrir kerfi 8 og 9 er forrit sem eingöngu er til þess ætlað að yfirfara letur og kanna hvort það væri óskemmt. Með MacOsX kom út FontAgentPro sem er alvöru leturstýriforrit í hæsta gæðaflokki.
FontAgentPro (FAP) er nú í útgáfu 3.x, uppfært fyrir Tiger og er eitt öflugasta leturstýriforritið sem völ er á. Það hefur alla kosti FontAgent, gerir við letur og metur hvort letur sér í lagi, að því viðbættu að stýra því hvaða letur á tölvunni er virkt. Til þess að virkja letrið er það valið og forritið flytur afrit af því og setur í sínar eigin möppur á tilgreint svæði notandans. Þetta er frábært fyrir þá sem eiga ósamstætt safn af letri sem þeir vita ekki hvaðan kom eða af hverju það er yfirleitt á tölvunni.
Forritið er mjög stöðugt og stendur í fremstu víglínu í þessum efnum. FontAgentPro gefur mjög góðar upplýsingar um letrið, hver framleiðir það og þess háttar sem er góður kostur fyrir þá sem vilja kynnast þeim hlutum betur. FontAgentPro virkjar letur sem er í skjölum ef það er ekki opið (AutoActivation). Plug-ins fylgja með til þess fyrir helstu hönnunarforritin, Illustrator, InDesign og Quark, en ekki fyrir FreeHand.
Ekki er sérstök serverútgáfa fyrir miðlæga stjórnun af FontAgentPro en hinsvegar er FontAgent Pro Workgroup Edition (WE) sem gegnir svipuðu hlutverki. Bonjour (Rendevous) er nýtt til að samnýta letur og virkja það þannig milli tölva.
Fyrir mér er helsti ókostur forritsins sá sami og væri kostur fyrir marga aðra; að það skuli búa sér til eigin leturmöppur og setja allt letur í þær sem einu sinni hefur verið gert virkt (afrit sem betur fer). Heldur mikil ofstjórn fyrir minn smekk. Ef letrið á tölvunni minni er þokkalega skipulagt, hef ég ekki áhuga á að láta það tvöfaldast einhvers staðar annars staðar á tölvunni minni. Ítarlegri upplýsingar um FontAgentPro er að finna á heimasíðu Insidersoftware. Font Agent Pro
