2003.06
Ljósglætur í skammdeginu… eitthvað sem við flest getum á okkur bætt.
Hönnunarkeppni FÍT 2003 (www.loremipsum.is) er ein af þessum glætum. Í þessari keppni er keppt og dæmt í mörgum flokkum sem ekki rýmast undir hatti ÍMARK keppninnar. Það er helst undan því að kvarta þó hve stuttur fyrirvari er til að senda inn gögn til keppninnar og reyndar var skiladagur beint ofan í skilin í ÍMARK keppnina. Kannski er þetta þó bara allt í lagi. Menn eru þá kannski bara ferskari í minni um hvað var verið að gera á síðasta ári.
Það er afleitt hve þessi keppni fær litla umfjöllun út á við. Ég get að vísu ekki alveg fullyrt það í þetta skiptið þar eð ég var ekki á landinu þegar úrslit voru kunngerð. En þannig var það að minnsta kosti í fyrra. FÍT hefur stóran hluta auglýsingamanna innanborðs og ætti ekki að vera í miklum vandræðum með að kynna sig betur út á við með þekktum brellum. Vonandi verður það haft í huga í framtíðinni.
Yfirlit yfir vinningshafa og grip er hægt að sjá á vef FÍT.
Ekki síðri umfjöllun er á vef www.icelandicnationalteam.com. Og þar eru líka myndir frá atburðinum. Þetta er afbragðsvefur og fjallað um flest sem áhuga kann að vekja hjá hönnuðum. Mig langar til að minna fólk á að kíkja á þennan vef og að leggja orð í belg. Ekki veitir af að reyna að örfa umfjöllun um hönnun. Inntakið er sem sagt mjög gott. Ég hefði búist við aðeins flottari hönnun á vefnum en hann virkar vel og auðvelt að rata um svæðið.
Ég gef FÍT þrjár fjaðrir fyrir hönnunarkeppnina.
www.icelandicnationalteam.com fær þrjár fyrir frábært framtak og gott inntak vefs.
Viðbót 12.05.2005: Því miður er icelandicnationalteam.com ekki lengur á meðal vor.
