2002.53
Talsvert er um frumsýningar á auglýsingum síðustu daga hvers árs og jafnvel síðustu auglýsingatímum ársins í sjónvarpi.
Auðvitað rökrétt í ljósi þess að þá er gullið tækifæri til að ná beinu sambandi við nánast alla þjóðina á einu bretti. Svo er ekki verra fyrir auglýsingastofurnar að koma að þó ekki nema væri einni birtingu auglýsingar svo hún verði gjaldgeng í næstu ÍMARK keppninni.
Það sem ég ætlaði hins vegar að fjalla örstutt um eru plaköt Íslensku óperunnar að undanförnu. Í haust birtust mjög fín plaköt og meðfylgjandi auglýsingar. Þemað var framíköll áhorfenda ópera. Eða öllu heldur leiðbeiningar til áhorfenda um hvernig þau eigi að vera samkvæmt ítalskri málfræði, bravo fyrir góðan karlsöng, brava til kvenkynshyllingar og svo framvegis. Plakötin voru hreint til sóma. Rotis letur og fallegir jarðlitir. Einnig er unnið áfram með sama þema í vefborðum með skemmtilegum teikningum á ágætri og efnisríkri vefsíðu óperunnar, www.opera.is.
Nú eru komin ný plaköt fyrir væntanlega sýningu á Macbeth. Hægt er að líta á þau sýningarglugga í Ingólfsstætinu. Það sem er sérstaklega skemmtilegt er að þetta eru fjögur sjálfstæð plaköt sem tengjast þó saman með orðinu Macbeth. Sjón er sögu ríkari og upplagt að kíkja á þetta. Ein bestu plaköt ársins að mínu mati. Þrjár fjaðrir í hattinn fyrir grunnhugmynd og leturnotkun. Vonandi er einhver til í að senda inn svar hér um hver hafi hannað plakötin.
